بسمة وهبة بعد انهيارها من البكاء بسبب محمد فؤاد في "العرافة": شعرت بكسرة القلب

انهارت الإعلامية بسمة وهبة على الهواء، بعد غناء الفنان محمد فؤاد أغنية "طمني عليك"، أثناء استضافته معها في برنامج "العرافة"، وظهر عليها التأثر والبكاء بشكل واضح، للدرجة التي جعلتها تردد "كفاية يا محمد".

وبعد أن تساءل الجميع عن سر تأثر بسمة وهبة لهذه الدرجة بسبب كلمات لأغنية، أوضحت الإعلامية السبب عبر حسابها في انستجرام قائلة "بص يا محمد يا فؤاد أنا بجد مش مسامحاك ومتشكرة ليك لان الأغنية بقيت اسمعها وعايزة أقول للسادة المشاهدين أن أغنية ممكن تكسر البني آدم من جوة، وتحسسه بحزن شديد، زمان الأغنية دي لما كانت بتشتغل مكنتش بحس بالضعف ده ولا بكسرة القلب ده والحزن ده لكن أنا كبرت في السن، كل ما أكبر كل ما مشاعري بتكبر".

وتابعت أن تلك الأغنية تذكرها بأولادها الذين يعيشون بعيدًا عنها، وتحلم بأن تراهم، مضيفة أنها لم تسامحه أنه استغل نقطة ضعفها، وأنها مازالت تشعر بحزن نحوه.

وأكدت "كلمات الأغنية صعبة للي مفتقد شخص، ولادي لما بيوحشوني بروح على صورهم واشوفها عشان تصبرني وانا ولادي مش عايشين معايا من صغرهم كل واحد في بلد، انا كبرت وعرفت دلوقت اني كبرت لان مشاعري مش بتتحمل، بيوحشوني أكتر من الأول وبشتاق لهم اكتر من الاول ونفسي أعيش معاهم اكتر من الاول".

واختتمت بسمة وهبة تعليقها قائلة: "أنا لولا اني بحترم المحطة كنت سبت الحلقة بس انا كملت الحلقة، ومش مسامحاك يا محمد يا فؤاد ولا مسامحه كل واحد تآمر معاك عارف نقطه ضعفي".